नाशिक : ‘आर्ट ऑफ लिव्हिंग’ या प्रसिद्ध आध्यात्मिक संस्थेच्या वतीने यंदा भाऊबीजेदिवशी नाशिकमध्ये विशेष कार्यक्रम आयोजित करण्यात आला आहे. त्या दिवशी वीस हजार बहिणी वीस हजार भावांना औक्षण करणार आहेत. तपोवनमध्ये २९ ऑक्टोबर रोजी सायंकाळी सहा ते रात्री नऊ या वेळेत हा कार्यक्रम होणार असून, त्याची गिनीज बुक ऑफ वर्ल्ड रेकॉर्डमध्ये नोंद होऊ शकते, असे सांगण्यात आले आहे.
त्या कार्यक्रमात श्री श्री रविशंकर यांचा सत्संग, श्री गणेश होम, अष्टलक्ष्मी होम आदी कार्यक्रमांसह भाऊबीज दीपावली मिलन कार्यक्रम होणार आहे. त्यातच वीस हजार भावांना वीस हजार बहिणी औक्षण करणार असल्याची माहिती मुख्य समन्वयक विजय हाके यांनी पत्रकार परिषदेत दिली.
‘नाशिक शहरात असा कार्यक्रम पहिल्यांदाच होत आहे. या कार्यक्रमाला धार्मिक आणि सामाजिक अधिष्ठान लाभणार आहे. प्रभू रामचंद्रांच्या पदस्पर्शाने पावन झालेल्या नाशिक पुण्यभूमीत हा कार्यक्रम होणार असल्यामुळे सबंध जिल्हा आणि जिल्ह्याबाहेरील ‘आर्ट ऑफ लिव्हिंग’चे सदस्य या कार्यक्रमात मोठ्या भक्तिभावाने सहभागी होणार आहेत नाशिक येथील कुंभमेळ्यासाठी आरक्षित असणाऱ्या तपोवनातील जागेवर हा कार्यक्रम होणार आहे. यासाठी नागरिकांना उपस्थित राहण्यासाठी नाशिक शहरात जनजागृती केली जात आहे. याची नोंद ‘गिनीज बुक ऑफ वर्ल्ड रेकॉर्ड’मध्ये ही होऊ शकते,’ असे ‘आर्ट ऑफ लिव्हिंग’तर्फे सांगण्यात आले.
‘‘आर्ट ऑफ लिव्हिंग’चे संस्थापक श्री श्री रविशंकर यांनी नाशिकमध्ये यावे अशी अनेक दिवसांपासूनची अपेक्षा या निमित्ताने पूर्ण होणार असून, या सोहळ्यास दीड ते दोन लाख लोकांची उपस्थिती असेल. हा कार्यक्रम सर्वांना विनामूल्य खुला असेल. दुसऱ्या दिवशी सकाळी निवडक साधकांसाठी ‘श्री श्रीं’चा सत्संग होणार आहे. ‘आर्ट ऑफ लिव्हिंग’ ही विज्ञानवादी चळवळ असून, व्यक्तीने समाजात वावरताना सकारात्मक विचारसरणीने वावरायला हवे. कुटुंबाबरोबरच राष्ट्राचा विकास व्हायला पाहिजे, अशी शिकवण संस्थेतर्फे दिली जाते. पंतप्रधान नरेंद्र मोदी यांची सभा झाली, त्या २० एकर क्षेत्राच्या मैदानात हा सोहळा होणार असून, त्यासाठी १०० बाय ८० फुटांचे भव्य स्टेज उभारले आहे. या ठिकाणी प्रशासकीय बंदोबस्त ठेवला जाणार आहे. यासाठी सहभागी होण्याचे आवाहन नाशिककरांना करण्यात येत आहे,’ असे हाके यांनी सांगितले.